Kristján Eldjárn Þórarinsson
- Fyrir forsetann, sjá Kristján Eldjárn.
Kristján Eldjárn Þórarinsson (f. 31. maí 1843, d. 16. september 1917), sonur sr. Þórarins Kristjánssonar prófasts í Vatnsfirði og konu hans Ingibjargar Helgadóttur alþingismanns frá Vogi á Mýrum. Kristján ólst að nokkru upp hjá afa sínum sr. Kristjáni Þorsteinssyni sem prestur var bæði á Tjörn og Völlum í Svarfaðardal og raunar víðar. Hann varð stúdent frá Lærða skólanum í Reykjavík 1869 og kandídat frá Prestaskólanum 1871. Meðal bekkjarbræðra hans í Reykjavík voru Kristján Jónsson fjallaskáld, Jón Ólafsson (ritstjóri) og sr. Valdimar Briem. Sér þess staði í kveðskap þeirra allra. Strax að námi loknu vígðist Kristján til Staðar í Grindavík og þjónaði þá einnig Selvogsþingum. Árið 1878 fékk hann Tjörn í Svarfaðardal og var þá kominn á æskuslóðir sínar og sat þar til dauðadags. Sr. Kristján var vinsæll prestur í söfnuði sínum og hrókur alls fagnaðar á mannamótum, sögumaður góður og heppinn læknir. Hann var síðasti prestur á Tjörn en staðurinn var lagður af sem prestssetur að honum gengnum.
![](http://upload.wikimedia.org/wikipedia/commons/thumb/9/92/Pert%C3%ADna_Soff%C3%ADa.jpg/140px-Pert%C3%ADna_Soff%C3%ADa.jpg)
Kona sr. Kristjáns var Petrína Soffía Hjörleifsdóttir (f. 29. mars 1850, d. 9. mars 1916). Sr. Hjörleifur Guttormsson faðir hennar hafði verið prestur á Skinnastað en á efri árum sínum flutti hann í Svarfaðardal og þjónaði Tjörn um árabil. Hann fór síðan í Velli en Petrína Soffía varð þá eftir á Tjörn og giftist nýja prestinum þar.
Börn Kristjáns og Petrínu Soffíu sem upp komust voru:
- Þorbjörg f. 1882
- Ingibjörg f. 1884
- Þórarinn f. 1886
- Ólöf f. 1888
- Sesselja Guðrún f. 1893.
Þau systkinin tóku upp ættarnafnið Eldjárn árið 1918.
Heimildir[breyta | breyta frumkóða]
- Hjörtur E. Þórarinsson (1992). Tjarnarkirkja 100 ára, 1892-1992. Sóknarnefnd Tjarnarkirkju.
- Stefán Aðalsteinsson (1978). Svarfdælingar. Iðunn, Reykjavík.
- Gísli Brynjólfsson (1975). Mannfólk mikilla sæva. Staðhverfingabók. Örn og Örlygur, Reykjavík.